भोटेकोशी बाढीः नेपाली सेनाका एकसहित खोटाङका आठ जना सम्पर्कविहीन

भोटेकोशीमा आएको भीषण बाढीपछि एक जना नेपाली सनोका लेसनायकसहित खोटाङका आठ जना सम्पर्कविहीन भएका छन् । रोजगारी, व्यापार तथा अन्य कामको सिलसिलामा रसुवा तथा आसपासका जिल्लामा रहेको अवस्थामा भोटेकोशीमा आएको बाढीपछि खोटाङका आठ सम्पर्कविहीन भएका हुन् ।

नेपाली सेनाका लेसनायक पवन खत्री (दाहाल)सहित विभिन्न पेसा-व्यवसायको सिलसिलामा बाढी प्रभावित क्षेत्रमा रहेका आठ जना खोटाङ्गे सम्पर्कविहीन भएका जिल्ला प्रहरी कार्यालयले जानकारी दिएको छ । दिक्तेल रुपाकोट मझुवागढी नगरपालिका-३ बाम्राङ निवासी सेनाका लेसनायक ३२ वर्षीय खत्री, सोही स्थानका २७ वर्षीय सुर्जबहादुर परियार, मझुवागढीका-१५ विजयखर्कका ४३ वर्षीय कविन राई, ऐसेलुखर्क गाउँपालिका-४ जलेश्वरीका ४१ वर्षीय बालकुमार तामाङ, वडा नं ३ ऐसेलुखर्कका ५३ वर्षीय युवराज राई र ३३ वर्षीय यसबहादुर राई, ऐसेलुखर्क-७ माक्पाका ६० वर्षीय तारानाथ थापा र उमेर नखुलेका रावाबेँसी गाउँपालिका-३ लामीडाँडाका पुष्प भट्टराई सम्पर्कविहीन भएका जिल्ला प्रहरी कार्यालयका सूचना अधिकारी निराजन बस्नेतले जानकारी दिनुभयो ।