कोसी जनस्वास्थ्य प्रयोगशाला पूर्ण डिजिटल, घरबाटै दर्ता र अनलाइन रिपोर्ट

विराटनगर । कोसी प्रदेश सरकारअन्तर्गतको प्रदेश जनस्वास्थ्य प्रयोगशाला, विराटनगरले स्वास्थ्य सेवालाई प्रविधिमैत्री बनाउँदै प्रशासनिक कामदेखि प्रयोगशाला परीक्षणसम्मका अधिकांश सेवा पूर्ण रूपमा डिजिटल माध्यमबाट सञ्चालन गरिरहेको छ । अनलाइन पोर्टल र कुरियर प्रणालीको प्रयोगसँगै सेवाग्राहीले कार्यालय धाउनुपर्ने झन्झट हटेको प्रयोगशालाले जनाएको छ ।

प्रयोगशालाका निमित्त निर्देशक प्रकाशचन्द्र कार्कीका अनुसार निजी प्रयोगशालाको दर्ता तथा नवीकरण, परीक्षण रिपोर्ट प्राप्त गर्ने सेवा, प्रयोगशालाको सूचीकरण, प्रशासनिक व्यवस्थापन र कर्मचारीको ई–हाजिरीसम्मका सेवा एकीकृत डिजिटल प्रणालीमार्फत सञ्चालनमा छन् । यसले सेवाप्रवाहलाई छरितो, पारदर्शी र सहज बनाएको उनको भनाइ छ ।