हाइड्रोजनमा आधारित सवारीसाधनका लागि नीतिगत व्यवस्था गर्न सरकारले माग्यो सुझाव

काठमाडौँ । सरकारले हाइड्रोजनमा आधारित सवारीसाधनको सुरक्षित, दिगो तथा प्रभावकारी विकास, सञ्चालन र नियमनका लागि आवश्यक नीतिगत व्यवस्था गर्नसम्बन्धी सुझाव आह्वान गरेको छ। पूर्वाधार विकास मन्त्रालयले कानुनी तथा प्राविधिक आधार तयार पार्ने उद्देश्यले अन्तरराष्ट्रिय उत्कृष्ट अभ्यास, नियामक व्यवस्था, सुरक्षा मापदण्ड तथा दिशानिर्देश, हाइड्रोजन प्रविधिमा रूपान्तरणको सम्भावना र आवश्यक जनशक्ति विकाससम्बन्धी लिखित सुझावहरू माग गरेको हो।

यस विषयमा विश्वविद्यालय, अनुसन्धान संस्था, व्यावसायिक निकाय, उद्योग, विकास साझेदार, अन्तरराष्ट्रिय संस्था तथा सम्बन्धित सरोकारवालाहरूले आफ्नो अनुभव, अध्ययन र व्यावहारिक अभ्यासका आधारमा सुझाव दिन सक्नेछन्।