कांग्रेसमा एकताको विकल्प छैन

नेपालको लोकतान्त्रिक इतिहासलाई कुनै पनि कोणबाट हेर्दा एउटा सत्य स्पष्ट देखिन्छ - नेपाली कांग्रेस केवल एउटा राजनीतिक दल होइन, लोकतान्त्रिक आन्दोलनको जीवित इतिहास हो। यसले राणा शासनविरुद्धको संघर्षदेखि प्रजातन्त्रको स्थापना, बहुदलीय व्यवस्थाको पुनस्र्थापना, जनआन्दोलन, शान्ति प्रक्रिया र संविधान निर्माणसम्म हरेक ऐतिहासिक मोडमा राष्ट्रलाई दिशा दिएको छ। त्यसैले नेपाली कांग्रेसको शक्ति वा कमजोरी कुनै एक दलको विषय मात्र होइन, यो नेपालको लोकतान्त्रिक भविष्यसँग प्रत्यक्ष रूपमा जोडिएको प्रश्न हो। इतिहासले कुनै पनि संस्थालाई सम्मान त्यसको विगतका उपलब्धिका कारण दिन्छ तर भविष्यको नेतृत्व वर्तमानको कार्यशैलीले निर्धारण गर्छ। यही सन्दर्भमा आज नेपाली कांग्रेसले आफूलाई एउटा गम्भीर प्रश्न सोध्नुपर्ने समय आएको छ– के हामी इतिहासको गौरवमा मात्र बाँचिरहेका छौं वा इतिहासलाई नयाँ युगसँग जोड्ने साहस पनि गरिरहेका छौं ?

समय बदलिएको छ। समाज बदलिएको छ। प्रविधि, अर्थतन्त्र, शिक्षा, सञ्चार र नागरिकको सोचमा व्यापक परिवर्तन आएको छ। आजका युवाले केवल राजनीतिक नाराभन्दा परिणाम खोज्छन्। उनीहरू पारदर्शिता, उत्तरदायित्व, दक्षता र भविष्यप्रतिको स्पष्ट दृष्टि चाहन्छन्। यस्तो अवस्थामा कुनै पनि दलले विगतको गौरवलाई मात्र आधार बनाएर जनविश्वास कायम राख्न सक्दैन। इतिहास प्रेरणा हो तर भविष्य निर्माण गर्न नवीन सोच, स्पष्ट नीति र समयअनुकूल नेतृत्व आवश्यक हुन्छ।