कर्मचारी र माफियाको सेटिङमा अर्बौंका रूख काटिए

कैलालीका ११ सामुदायिक वनमा वन कर्मचारी, माफिया र प्रदेश सरकारको मन्त्रालयका कर्मचारीसमेतको मिलेमतोमा अर्बौं रकमबराबरका साल र खयरका रूख कटान भएका छन्। विशेषज्ञ टोलीद्वारा झुटो प्रतिवेदन बनाएर हरिया र राम्रा रूख काटिएका छन् भने काटिएका रूखका काठ पनि मिलेमतोमा सूचना लुकाएर लिलाम बिक्री गर्ने तयारी गरिएको खुलासा भएको छ। प्रदेश सरकारका केही व्यक्ति, कर्मचारी र माफियाको सेटिङमा अर्बौं रुपैयाँ बराबरको रूख काटिएपछि स्थानीयले विरोध गरेका छन्।

अर्बौं रकम बराबरको रूख फडानी गरेर अनियमितता गरिएको र मिलेमतोमा काठ लिलाम बिक्री गर्न लागेको उजुरी परेपछि सुदूरपश्चिम प्रदेशसभा अर्थ विकास तथा प्राकृतिक स्रोत समितिले उपसमिति गठन गरेर अध्ययनसमेत गरेको छ। खगराज भट्टको संयोजकत्वमा पाँच सदस्यीय उपसमिति गठन गरेर सामुदायिक वनमा भएको रूख कटानी र अनियमितताको अध्ययन गरिएको थियो।