छायाङ्कन गन्तव्यको बाटोमा प्रशासनिक तगारो

नेपाललाई अन्तर्राष्ट्रिय फिल्म तथा अन्य श्रव्यदृश्य सामग्रीको छायाङ्कनका लागि उत्कृष्ट गन्तव्य बनाउने सरकारी प्रतिबद्धता नयाँ होइन । हरेक सरकारले पर्यटनलाई जोड्दै नेपाललाई अन्तर्राष्ट्रिय फिल्म तथा अन्य श्रव्यदृश्य सामग्रीको छायाङ्कनका लागि उत्कृष्ट गन्तव्य बनाउने प्रतिबद्धता गर्दै आएको छ ।

हिमाल, पहाड, तराई, ऐतिहासिक सम्पदा, सांस्कृतिक विविधता र प्राकृतिक सौन्दर्यका कारण नेपाल विश्वका धेरै निर्देशक र निर्माण कम्पनीको रोजाइमा पर्दै आएको छ । पछिल्ला वर्षहरूमा विदेशी फिल्मका साथै म्युजिक भिडियो, विज्ञापन, वेब सिरिज तथा डिजिटल सामग्रीको छायाङ्कनका लागि समेत नेपालप्रतिको आकर्षण बढिरहेको छ । तर यति ठूलो सम्भावनाबीच पनि हाम्रो प्रशासनिक संयन्त्र भने समय अनुकूल परिवर्तन हुन सकेको छैन । सरकारको नीतिगत प्रतिबद्धता र व्यावहारिक कार्यप्रणालीबीचको यही अन्तर अहिले मुख्य चुनौती बनेको छ ।