रास्वपा साढे तीन वर्षभन्दा बढी टिक्ने सम्भावना छैन

वर्तमान नेपाली राजनीति तरल अवस्थामा छ । विशेषगरी राष्ट्रिय स्वतन्त्र पार्टी (रास्वपा) को उदय र यो पार्टी सरकारमा पुगेपछि सिर्जना भएका विभिन्न शङ्कास्पद परिस्थितिलाई गहिरो विश्लेषण गर्न आवश्यक छ । अहिले रास्वपाभित्र र सरकारमा देखिएको बेमेल तथा एक–अर्काप्रतिको असन्तुष्टिले धेरै प्रश्न उब्जाएको छ । धेरैले रवि लामिछाने र बालेन शाहबिच कुनै समझदारी नभएको हो कि भन्ने आशङ्का पनि गरिरहेका छन् । तर यो समग्र परिस्थिति र रास्वपाको उदयलाई बुझ्न यसको आन्तरिक बनावटलाई हेर्नुपर्ने हुन्छ ।

मेरो दृष्टिकोणमा राष्ट्रिय स्वतन्त्र पार्टी एउटा राजनीतिक दल नै होइन । यसलाई एउटा ‘ट्रेन स्टेशन’ का रूपमा बुझ्न सकिन्छ, जहाँ एउटा ट्रेन आयो र त्यसमा विभिन्न गन्तव्य भएका मुसाफिरहरू (यात्रुहरू) सँगै जाउँ भनेर चढे । त्यहाँ चढ्नेमध्ये कोही नजिकको गन्तव्य भएका र कोही टाढासम्म पुग्ने गन्तव्य भएका मानिस छन् । यो कुनै निश्चित राजनीतिक विचारधारा, कुनै ठोस कार्यक्रम, कुनै राजनीतिक दर्शन वा आर्थिक दर्शनले चलेको शक्ति होइन । हुन त यो पार्टी बनिसकेको छ र सरकारमा पनि सहभागी छ, तर यसको भित्री संरचना भने निकै जटिल छ ।