गगनेको पहिरोले फेरि ठप्प कर्णाली राजमार्ग

शुक्रबार दिनभर परेको अविरल वर्षाले कालिकोटको शुभकालिका गाउँपालिका-१ स्थित गगने खोलामा ठूलो पहिरो झरेपछि कर्णाली राजमार्गको सुर्खेत-जुम्ला सडकखण्ड बेलुका ७:४५ बजेदेखि पूर्ण रूपमा अवरुद्ध भएको छ।

सडक बन्द भएसँगै जुम्ला, मुगु, हुम्ला, कालिकोट, बाजुरा र कर्णाली करिडोर हुँदै यात्रा गर्ने सयौँ यात्रु तथा मालवाहक सवारीसाधन बीच बाटोमै रोकिएका छन्। सडक डिभिजन कार्यालय जुम्लाका अनुसार निरन्तर वर्षा र माथिबाट खसिरहेकै ढुङ्गा-माटोका कारण रातभर पहिरो हटाउन सम्भव भएन। मौसम अनुकूल भए शनिबार बिहानैदेखि डोजर र प्राविधिक टोली परिचालन गरी सडक खुलाउने तयारी गरिएको छ।