सांसद बब्लु गुप्तालाई ट्राफिक कारवाही, आफैं पुगेर तिरे ५ सय रुपैयाँ जरिबाना

काठमाडौं- सामाजिक सञ्जालमा भाइरल भएको एक भिडियोले अन्ततः प्रतिनिधिसभा सदस्य बब्लु गुप्तालाई ट्राफिक कारवाहीको दायरामा ल्याएको छ। सिरहा–१ बाट निर्वाचित राष्ट्रिय स्वतन्त्र पार्टी (रास्वपा)का सांसद गुप्ताले गुडिरहेको मोटरसाइकलको पछाडि उभिएर भिडियो बनाएको घटनामा ट्राफिक नियम उल्लंघन गरेको ठहर गर्दै जिल्ला ट्राफिक प्रहरी कार्यालय, लहानले ५ सय रुपैयाँ जरिबाना गरेको हो।

रोचक कुरा के छ भने, कारवाहीपछि सांसद गुप्ता आफैं ट्राफिक कार्यालय पुगेर जरिबाना बुझाएका छन्। सार्वजनिक पदमा रहेका व्यक्तिमाथि पनि कानुन समान रूपमा लागू भएको भन्दै यो घटनालाई धेरैले कानुनी समानताको उदाहरणका रूपमा लिएका छन्।