इरान युद्धमा मृत अमेरिकी सैनिकको सङ्ख्यालाई लिएर विवाद

वासिङ्टन डीसी । अमेरिकी रक्षा मन्त्रालय (पेन्टागन) ले सार्वजनिक गरेको इरान युद्धमा मारिएका सैनिकहरूको आधिकारिक सूचीलाई लिएर नयाँ विवाद उत्पन्न भएको छ । द न्यु योर्क टाइम्सका अनुसार बुधबारसम्म उक्त सूचीमा १८ अमेरिकी सैनिकको मृत्यु भएको उल्लेख गरिएको थियो । तर बिहीबार सो सङ्ख्या घटाएर १४ बनाइएको छ ।

पेन्टागनको डिफेन्स क्याजुअल्टी एनालाइसिस सिस्टम वेबसाइटमा अहिले पनि अपरेसन एपिक फ्युरीअन्तर्गत इरान युद्धमा १४ जना अमेरिकी सैनिक मात्र मारिएको देखाइएको छ । तर गत साता मारिएका चार सैनिकको शव अमेरिकामा ल्याइएको जानकारी भने पेन्टागनले छुट्टै विज्ञप्तिमार्फत सार्वजनिक गरेको थियो ।