प्रदेशमा मिल्दै एमाले-नेकपा

नेपाली कांग्रेस र नेकपा एमालेबिच प्रदेश सत्ता समीकरणमा दरार आएसँगै सातै प्रदेशमा मिलेर अघि बढ्ने कसरतमा दुई वाम दलका नेताहरू जुटेका छन्। एमाले र नेपाली कम्युनिस्ट पार्टी (नेकपा) का नेताहरूले उपेन्द्र यादव नेतृत्वको जनता समाजवादी पार्टी (जसपा) नेपाललाई समेत साथमा लिएर अघि बढ्ने भएका हुन्। एमाले र नेकपाका दोस्रो तहका नेताले सत्ता सहकार्यको प्रस्ताव तयार पारिरहेका छन्।

एमालेबाट प्रतिनिधिसभा संसदीय दलका नेता रामबहादुर थापासहितका नेता प्रदेश सत्ता समीकरण गृहकार्यमा छन्। त्यस्तै नेकपाबाट वर्षमान पुन, प्रमेश हमाललगायतले काम गरिरहेका छन्। एमाले र नेकपा एक÷दुई दिनभित्रै यादव नेतृत्वको जसपालाई समेत साथमा लिएर सातै प्रदेशमा सत्ता सहकार्य प्रस्तावमा हस्ताक्षर गर्ने तयारीमा छन्। कुन प्रदेशको नेतृत्व कसले गर्ने भन्ने टुंगो लाग्न बाँकी रहेको जनाउँदै एक नेताले भने, ‘हामी छिट्टै एउटा समझदारीमा पुग्छौं।’