मधेश प्रदेश सञ्चार विधेयकमा फोनिजको पनि आपत्ति, सरकारविरुद्ध एकजुट हुन अपिल

जनकपुरधाम । नेपाल आदिवासी जनजाति पत्रकार महासंघ (फोनिज) मधेश प्रदेश समितिले पनि मधेश प्रदेश सरकारले ल्याउन लागेको सञ्चारसम्बन्धी विधेयकमा आपत्ति जनाएको छ ।

शुक्रबार जारी प्रेस विज्ञप्तिमार्फत फोनिजले चालु आर्थिक वर्षको बजेटमार्फत प्रदेशको सञ्चार क्षेत्रलाई निरुत्साहित गर्ने नीति अवलम्बन गरिएको भन्दै असन्तुष्टि व्यक्त गरेको हो। प्रदेश ऐनअनुसार स्थापना भएका स्वायत्त सञ्चार संस्थालाई पर्याप्त बजेट, जनशक्ति र अधिकार उपलब्ध नगराई प्रभावकारी रूपमा सञ्चालन हुन नदिने तथा पछि ती संस्थाको औचित्यमाथि प्रश्न उठाउने प्रयास संघीय शासन व्यवस्था र संविधानको भावना विपरीत रहेको विज्ञप्तिमा उल्लेख छ।