बच्चालाई होइन पहिला आफूलाई सम्हालुन् आमा–बुबा

काठमाडौँ । बालबालिकाले मोबाइल वा अन्य डिजिटल उपकरण धेरै प्रयोग गर्नु चिन्ताको विषय बन्दै आएको छ । तर नयाँ अध्ययनले समस्या बालबालिकाको मात्र नभई आमाबुबाको स्क्रिन प्रयोग पनि उनीहरूको मानसिक र भावनात्मक विकासका लागि हानिकारक हुन सक्ने देखाएको छ ।

हालै प्रकाशित एक अध्ययनअनुसार, आफ्ना आमाबुबा सधैं मोबाइल वा अन्य डिजिटल उपकरणमा व्यस्त रहने महसुस गर्ने बालबालिकामा असुरक्षित भावनात्मक सम्बन्ध विकसित हुने सम्भावना बढी हुन्छ । यसले उनीहरूको आत्मविश्वास, सामाजिक सम्बन्ध र भावनात्मक स्वास्थ्यमा दीर्घकालीन असर पार्न सक्ने अनुसन्धानकर्ताहरूले बताएका छन् ।