फेरि पनि गैरजिम्मेवार ब्याटिङ

नेपाली पुरुष राष्ट्रिय क्रिकेट टोलीका कप्तान रोहितकुमार पौडेल दुई साताअघि नेदरल्यान्ड्स भ्रमणमा निस्किनुअघि आत्मविश्वासी देखिन्थे। उनले टोलीको तयारी र पछिल्ला प्रदर्शनप्रति सन्तुष्टि व्यक्त गर्दै भनेका थिए, “हामीले ब्याटिङ युनिटका रूपमा राम्रो टेम्प्लेट बनाएका छौँ। नेदरल्यान्ड्स र नामिबिया दुवै टोलीलाई हराउन सक्छौँ भन्ने विश्वास छ।”

रोहितको यस भनाइमा केही आधार पनि थियो। उनकै कप्तानीमा नेपालले गत अप्रिल-मेमा कीर्तिपुरस्थित त्रिवि क्रिकेट मैदानमा सम्पन्न आईसीसी क्रिकेट विश्वकप लिग-२ अन्तर्गत ओमान, संयुक्त अरब इमिरेट्स (यूएई), स्कटल्यान्ड र अमेरिकाविरुद्ध खेलेका आठमध्ये ६ खेल जित्दै उत्कृष्ट प्रदर्शन गरेको थियो। सँगै नेदरल्यान्ड्स प्रस्थानअघि जर्सीविरुद्धको दुई खेलको एकदिवसीय सिरिज पनि ‘क्लिन स्विप’ गर्दै नेपालले लय समातेको संकेत दिएको थियो।