अनैतिक गतिविधिमा संलग्न ४७ विदेशी महिला देश निकाला

काठमाडौं । जिल्ला प्रहरी परिसर काठमाडौंले विशेष अपरेसनमार्फत अनैतिक गतिविधिमा संलग्न ४७ जना विदेशी महिलालाई देश निकाला (डिपोर्ट) गरेको जनाएको छ। शुक्रबार आयोजित पत्रकार सम्मेलनमा परिसरका एसपी पवनकुमार भट्टराईले ठमेल, दरबारमार्गलगायतका पर्यटकीय क्षेत्रमा अनैतिक क्रियाकलापमा संलग्न ५७ जना विदेशी महिलालाई पक्राउ गरिएकोमा अनुसन्धानपश्चात ४७ जनालाई अध्यागमन विभागमार्फत डिपोर्ट गरिएको जानकारी दिएका हुन्।

देश निकाला गरिएकाहरूलाई युगान्डा, भियतनाम, थाइल्याण्ड, बंगलादेश, केन्या र इन्डोनेसिया पठाइएको छ भने बाँकी १० जनामाथि अहिले पनि अनुसन्धान जारी रहेको प्रहरीले जनाएको छ।