बिस्का जात्रा सकिएको तीन महिना, रथका पाङ्ग्रा अझै अलपत्र

भक्तपुरको विश्वप्रसिद्ध बिस्का जात्रा सम्पन्न भएको तीन महिना बितिसकेको छ। तर वैशाख ५ गते सम्पन्न भएको जात्रामा प्रयोग गरिएको भैल खः (भैरवनाथको रथ) का ठूला काठका पाङ्ग्रा अझैसम्म व्यवस्थापन हुन सकेका छैनन्। ती पाङ्ग्रा अहिले पनि भक्तपुरस्थित पाँचतल्ले मन्दिर परिसरमा अलपत्र अवस्थामा रहेका छन्।

यस विषयमा ध्यानाकर्षण गराउँदै श्री भैरवनाथ जात्रा सहयोग समितिले शुक्रबार गुठी संस्थान शाखा कार्यालय, सूर्यविनायक, भक्तपुरमा ज्ञापनपत्र बुझाएको छ। समितिका अध्यक्ष शिवराम किजू को नेतृत्वमा गएको स्थानीयवासीको टोलीले रथका काठ तथा अन्य सामग्री तत्काल व्यवस्थित गर्न माग गरेको हो।