देशभर २४ घण्टामा विपद्का २९ घटना: छ जनाको मृत्यु, १३ घाइते

काठमाडौं । नेपालका २४ जिल्लामा पछिल्लो २४ घण्टाको अवधिमा भएका २९ वटा प्राकृतिक तथा गैर–प्राकृतिक विपद्का घटनामा परि ६ जनाको मृत्यु भएको छ भने १३ जना घाइते भएका छन्। गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणले साउन ९ गते बिहान १० बजे सार्वजनिक गरेको विवरणअनुसार सर्पदंशबाट ४ जना, पहिरोबाट १ जना र ग्यास विष्फोटबाट १ जनाले ज्यान गुमाएका हुन्।

पछिल्लो २४ घण्टाको अवधिमा ७ जिल्लामा भएका ११ वटा सर्पदंशका घटनाबाट ४ जनाको मृत्यु र ७ जना घाइते भएका छन् भने ७ जिल्लामा घटेका ८ वटा पहिरोका घटनामा १ जनाको मृत्यु र ३ जना घाइते हुनुका साथै १ जनाको सकुशल उद्धार गरिएको छ। यसैगरी ग्यास विष्फोटको एक घटनामा १ जनाको मृत्यु र १ जना घाइते भएका छन्।