लप्सेखोलामा अस्थायी बेलिब्रिज जडानका लागि ठेक्का आह्वान

खोटाङ । मध्यपहाडी लोकमार्गअन्तर्गत दिक्तेल–चखेवाभञ्ज्याङ सडकखण्डको लप्से (पङ्खु) खोलामा अस्थायी बेलिब्रिज जडान गर्न ठेक्का आह्वान गरिएको छ । दिक्तेल रुपाकोट मझुवागढी नगरपालिका–८ बुवासुङ र लामीडाँडालाई जोड्ने लप्सेखोलामा बेलिब्रिज जडानका लागि पुष्पलाल (मध्यपहाडी) राजमार्ग योजना कार्यालय, रामेछापले भ्याट र कन्टिन्जेन्सी बाहेक एक करोड ६३ लाख ६४ हजार ९३४ रकमको ठेक्का खुलाएको हो ।

कार्यालयका सूचना अधिकारी इन्जिनियर भरत श्रेष्ठका अनुसार, लप्सेखोलामा पक्की पुल निर्माणको काम अलपत्र परेको अवस्थामा अस्थायी बेलिब्रिजमार्फत यातायात सञ्चालन गर्ने तयारी गरिएको हो । लप्सेखोलामा वि.सं. २०७२ असोज–७ गते ठेकेदार कम्पनी सिरुवा कन्ट्रक्सन प्रालिसँग १५ मिटर लम्बाइको मोटरेबल पक्की पुल वि.सं. २०७३ असोज–७ गतेभित्र सम्पन्न गर्नेगरी सम्झौता भएता पनि ठेकेदार कम्पनीले खोलाका दुई किनारामा पिलर ठड्याउने काम बाहेक कुनै प्रगति गरेन ।