विद्युत् महसुलमा भ्याट लाग्ने–नलाग्नेबारे प्राधिकरणले माग्यो राजस्व विभागको राय

नेपाल विद्युत् प्राधिकरणले आर्थिक ऐन, २०८३ अनुसार असार १ गतेदेखि ३२ गतेसम्मको विद्युत् खपतमा मूल्य अभिवृद्धि कर (भ्याट) लाग्ने वा नलाग्ने विषयमा आन्तरिक राजस्व विभागसँग राय मागेको छ।

प्राधिकरणका कायममुकायम कार्यकारी निर्देशक दीर्घायुकुमार श्रेष्ठले विभागलाई पत्राचार गर्दै प्राधिकरणले मासिक रूपमा विद्युत् खपतको रिडिङका आधारमा बिलिङ गर्दै आएको उल्लेख गरेका छन्। उनले असार १ देखि ३२ गतेसम्मको खपतको बिलिङ २०८३ साउन १ गतेदेखि भएको अवस्थामा त्यसमा मूल्य अभिवृद्धि कर आकर्षित हुने वा नहुने विषय स्पष्ट पारिदिन अनुरोध गरेका छन्।