कसरी जोगिने प्रलयकारी ताण्डवबाट ?

हिमनदीको अवस्था, उच्च हिमाली भूभागको परिवर्तन र नदीको पानीको स्तरलाई निगरानी गर्नुपर्ने घटनाले बताएको छ।

रसुवाको उत्तरी भेग र नेपाल–चीन सीमाक्षेत्रमा गत १० भदौमा आएको विनाशकारी बाढीको भग्नावशेष पन्छाउने र बेपत्ताहरूको खोजी कार्य अझै जारी छ। सुरुवाती दिनहरूमा बाढीको कारणबारे मनसुनी वर्षा, भूकम्प वा हिमताल फुटेको हुनसक्ने भन्दै विभिन्न आशंकाहरू गरिएका थिए। तर, पछिल्ला केही दिनयता सार्वजनिक भएका भू–उपग्रह तस्बिर, भौगर्भिक अनुसन्धान र अन्तर्राष्ट्रिय विज्ञहरूको प्राविधिक विश्लेषणले विपद्को वास्तविक र डरलाग्दो कारण उजागर गरेको छ। यस नयाँ तथ्यले हिमालय क्षेत्रमा बढ्दो जलवायु र भौगर्भिक जोखिमको नयाँ चित्र प्रस्तुत गर्दै हाम्रो पूर्वतयारीमाथि गम्भीर प्रश्न उठाएको छ।