वर्षभरि दिवंगत भएका आफन्तको सम्झनामा गाईजात्रा निकालियो

काठमाडौं । शनिवार काठमाडौं उपत्यका गाइजात्राको रौनकमा डुब्यो । नेवार समुदायले वर्षभरि दिवंगत भएका आफन्तको सम्झना गर्दै मनाउने यो पर्व जात्रा शोक, श्रद्धा, संस्कृति, सामाजिक चेतना र व्यंग्यलाई एउटै धागोमा गाँस्ने विशिष्ट परम्परा हो । भाद्र कृष्ण प्रतिपदा अर्थात् पारुको दिन मनाइने भएकाले यसलाई नेपाल भाषामा सापारु पनि भनिन्छ ।

गाईजात्राका दिन दिवंगत आफन्तको नाममा गाईको प्रतीक बनाएर नगर परिक्रमा गराउने चलन छ । कतिपयले वास्तविक गाईलाई सिंगारेर घुमाउँछन् भने कतिपयले मृतकको तस्वीर, गाईको आकृति वा बाँस तथा डोकोबाट बनाइएको प्रतीक बोकेर जात्रा निकाल्छन् । गाईको पुच्छर समातेर मृतात्माले वैतरणी नदी पार गर्न सजिलो हुने र यमलोकको यात्राबाट मोक्षको बाटो खुल्ने धार्मिक विश्वास रहेको छ ।