समाचारलाई पत्याउनेको सङ्ख्या घटेर हालसम्मकै न्यून, युवाहरू च्याटबटतर्फ आकर्षित

रोयटर्सले हालै सार्वजनिक गरेको उक्त अनुसन्धानले विश्वभर समाचारप्रतिको जनविश्वास स्तर ३७ प्रतिशतमा सीमित भएको देखाएको छ । जुन गत वर्षको यसै अवधिको तुलनामा ३ प्रतिशत विन्दुले कम हो । रोयटर्सले विश्वका ४८ वटा देशहरूमा अनुसन्धान गरेर उक्त निष्कर्ष निकालेको हो । विश्वभर समाचारप्रतिको विश्वासमा आएको यो गिरावटले आंशिक रूपमा समाचार उद्योगभन्दा बाहिरको व्यापक नैराश्यतालाई समेत झल्काउँछ ।

विभिन्न संघसंस्था र राजनीतिक नेतृत्वप्रतिको जनविश्वास चौतर्फी रूपमा खस्कँदै गएको छ । पत्रकारिता आफैँ पनि प्रायः उच्च ओहोदाका राजनीतिज्ञहरूको प्रत्यक्ष प्रहारको निसानामा पर्ने गरेको छ । यसकाे असर समाचारको विश्वसनीयतामा पनि परेकाे छ । समाचार उपभोगको शैलीमा आएको परिवर्तनले पनि विश्वासको संकट निम्त्याएको देखिएको छ । साथै, आगामी दिनमा समाचारप्रतिको विश्वास थप घट्न सक्ने अनुसन्धानले उजागर गरेको छ ।