मधेसमा लागुऔषधविरुद्ध अभियान, तीन वर्षमा दुई हजार ८११ जना पक्राउ

जनकपुरधाम । प्रतिबन्धित लागुऔषध नियन्त्रणका लागि प्रहरीले मधेश प्रदेशमा विशेष अभियान चलाएपछि लागुऔषध सेवनकर्ता र कारोबारीहरू धमाधम पक्राउ पर्न थालेका छन् । लागुऔषधविरुद्धको अभियानअन्तर्गत प्रहरीले नियमित जाँच गर्न थालेपछि मधेश प्रदेशका आठ वटै जिल्लामा गाँजा, चरेस, अफिम, ब्राउन सुगरलगायत लागुऔषध कारोबारमा संलग्नहरू पक्राउ पर्न थालेका हुन् ।

सङ्गठित अपराध लागुऔषधविरुद्ध अभियान चलाएको प्रहरीले मधेश प्रदेशका आठ वटै जिल्लाबाट ठूलो परिमाणमा लागुऔषध पनि बरामद गर्दै आएको छ । मधेश प्रदेश प्रहरी कार्यालयका अनुसार बितेका तीन आर्थिक वर्षमा मधेश प्रदेशमा विभिन्न प्रकारका लागुऔषधसहित दुई हजार ८११ जना पक्राउ परेका छन् भने दुई हजार १२१ वटा लागुऔषध सम्बन्धित मुद्दा दर्ता भएका छन् । उक्त अवधिमा दुई हजार ५५४ नेपाली, २५४ विदेशी नागरिकसहित दुई हजार ८११ जना पक्राउ परेको मधेश प्रदेश प्रहरी कार्यालयका प्रवक्ता प्रभुप्रसाद ढकालले जानकारी दिए ।