त्रिवि प्रश्नपत्र ‘लिक’ प्रकरण : कार्यालयले बनायो छानबिन समिति, राजीनामाको दबाब

काठमाडौं । त्रिभुवन विश्वविद्यालय (त्रिवि)को स्नातकोत्तर तह (एमबीएस) प्रथम सत्रको परीक्षा चलिरहेकै बेला प्रश्नपत्र सामाजिक सञ्जाल र ह्वाट्सएप समूहमा सार्वजनिक भएको घटनासँगै परीक्षा प्रणालीमाथि गम्भीर प्रश्न उठाइएको छ । तर, प्रश्नपत्र ‘लिक’ भएको घटनापछि अहिले बढी बहसको विषय बनेको छ, घटनाको छानबिन गर्ने समितिको निष्पक्षता ।

प्रश्नपत्र बाहिरिएको घटनाको अनुसन्धान गर्न त्रिवि व्यवस्थापन संकाय डीनको कार्यालयले तीन सदस्यीय छानबिन समिति गठन गरेको छ । तर, परीक्षा सञ्चालनदेखि परीक्षा केन्द्र निर्धारणसम्मको जिम्मेवारी रहेको निकायले आफ्नै कामको छानबिन आफैँ गर्न समिति बनाउँदा स्वार्थको द्वन्द्व देखिएको भन्दै कानुनी र सुशासनका जानकारले प्रश्न उठाएका छन् ।