पेटेन्टदेखि साइबर सुरक्षासम्म छरिएका सबै कानुनलाई समेट्न छाता ऐन ल्याउँदै सरकार

काठमाडौं । नेपाल सरकारले प्रविधिको तीव्र विकास र नवप्रवर्तनलाई व्यवस्थित गर्न वर्षौँ पुराना र विभिन्न क्षेत्रमा छरिएर रहेका कानुनहरूलाई एकीकृत गर्दै एउटा बलियो छाता ऐन ल्याउने तयारी थालेको छ । विज्ञान, प्रविधि तथा नवप्रवर्तन मन्त्रालयले हालै यसका लागि छुट्टै अवधारणापत्र स्वीकृत गरेको छ ।

विज्ञान, प्रविधि तथा नवप्रवर्तन विधेयकको मस्यौदा तर्जुमासम्बन्धी उक्त अवधारणापत्रले देशमा एकीकृत कानुनी ढाँचाको टड्कारो आवश्यकता औँल्याएको छ । प्रविधिको नियमन, बौद्धिक सम्पत्तिको सुरक्षा, नवप्रवर्तन र साइबर सुरक्षाका विभिन्न आयामहरूलाई समेट्ने गरी यो विधेयक तर्जुमा गर्न लागिएको हो ।