गेटामा यही सत्रबाट एमबीबीएस सञ्चालन गर्न मेयर हमालको आग्रह

धनगढी । धनगढी उपमहानगरपालिकाका नगर प्रमुख (मेयर) गोपाल हमालले कैलालीको गेटास्थित शहीद दशरथचन्द स्वास्थ्य विज्ञान विश्वविद्यालयमा यही शैक्षिक सत्रबाटै एमबीबीएस तहको पठनपाठन सुरु गर्न सबै पक्षसँग आग्रह गरेका छन् ।

हमालले सामाजिक सञ्जालमार्फत भिडियो सन्देश जारी गर्दै गेटा मेडिकल कलेज विश्वविद्यालयका रूपमा स्थापित भइसकेकाले अब थप ढिलाइ गर्न नहुने बताए । उनले पदाधिकारी नियुक्तिभन्दा शैक्षिक गतिविधि सुरु गर्नु र सर्वसाधारणलाई गुणस्तरीय स्वास्थ्य सेवा उपलब्ध गराउनु नै अहिलेको मुख्य प्राथमिकता भएको उल्लेख गरे ।