‘यो देश सबैको साझा होइन, हुँदै होइन’

‘यो देश सवैको साझा हो’ भनेर शिक्षकले पढाउँदै गर्दा एकजना विद्यार्थी आँखामा आँसु खसाल्दै प्रतिवाद गर्छन् । उनी शिक्षकसँग प्रश्न गर्छन्, यो देश कसरी सवैको साझा हुन्छ ? जबकि मैले यही देशमै बसेर सानो नाङलो पसल थापेर वस्दा मलाई नगर प्रहरीले बारम्बार लखेट्छ र काम गर्न दिंदैन । उनी तर्क गर्दै थप प्रश्न सोध्छन्, अनि कसरी यो देश सवैको साझा हो ? यो होइन गुरुजी, यो हुँदै होइन । आँखाबाट आँसु बगाउँदै यसो भन्दै गर्दा धेरैको आँखा रसाएको थियो ।

यो परिदृश्य हो, भक्तपुरमा प्रदर्शन गरिएको ख्याल (प्रहसन) खेल खतम नामक नाटकको । नाट्यकर्मी समाज नेपालको आयोजनामा भक्तपुरको लिवालीस्थित आस्था थिएटरमा यस्तैयस्तै विविध सामाजिक विषयवस्तु समेटिएको नाटक प्रदर्शनको महामेला चलिरहेको छ यतिखेर । ११ दिने नाटक मवहोत्सव साउन महोत्सव १९ गतेसम्म सञ्चालन हुनेछ ।