न्यूयोर्कका मेयरमाथि नेतान्याहुको कटाक्ष : गिरफ्तारीको धम्की दिएर घृणा फैलाउन खोजियो

इजरायली प्रधानमन्त्री बेन्जामिन नेतान्याहुले न्यूयोर्क सहरका मेयर जोहरान मामदानीले समाजमा 'घृणा फैलाएको' आरोप लगाएका छन्। न्यूयोर्क भ्रमणका क्रममा पक्राउ गर्ने धम्की दिएपछि नेतान्याहुले मेयर मामदानीले विभिन्न समुदायबीच विभाजन ल्याउन खोजेको बताएका हुन्।

आइतबार 'फक्स न्युज'सँग कुरा गर्दै प्रधानमन्त्री नेतान्याहुले आफू मेयरको धम्कीबाट चिन्तित नरहेको स्पष्ट पारे। 'उनी (मामदानी) यहुदी, ईसाई, मुस्लिम लगायत सबै न्यूयोर्कवासीका मेयर हुनुपर्ने हो, तर उनले एक समूहलाई अर्को विरुद्ध भड्काउने प्रयास गरिरहेका छन्,' नेतान्याहुले भने।