गेटा विश्वविद्यालयका रजिष्ट्रार हटाउने विषयमा सहमति नजिक, उपकुलपति तत्काल यथावत रहने सम्भावना

धनगढी - अनशनरत डा. गोविन्द केसीका माग सम्बोधन गर्न सरकार र डा. गोविन्द केसी पक्षबीच आइतबार भएको वार्ता सकारात्मक दिशातर्फ अघि बढेको छ। वार्तामा शहीद दशरथ चन्द स्वास्थ्य विज्ञान विश्वविद्यालय (गेटा)का रजिष्ट्रारलाई हटाउने विषयमा सहमति नजिक पुगेको छ भने उपकुलपति डा. सुनिलकुमार जोशीलाई विश्वविद्यालय ऐन संशोधन नभएसम्म यथावत राख्ने विकल्पमा छलफल भइरहेको छ।

शिक्षा मन्त्रालयको अग्रसरतामा गठित सरकारी वार्ता टोली र डा. केसी पक्षबीच सेती प्रादेशिक अस्पतालमा आइतबार दिउँसो १२ बजेदेखि राति ११ बजेसम्म वार्ता भएको थियो। वार्तामा अधिकांश मागमा सहमति नजिक पुगेको डा. केसी पक्षका वार्ता सदस्य डा. अमृत जैसीले जानकारी दिए।