डडेल्धुराको सडक सीमा विवाद समाधानउन्मुख

डडेल्धुरा । डडेल्धुराको मुख्य बजारमा घर बनाउने सपना बोकेका धेरै नागरिकका लागि पछिल्ला चार वर्ष सहज थिएनन् । कसैले घरको नक्सा तयार गरे, कसैले बैंकबाट ऋण स्वीकृत गराए, कतिपयले निर्माण सामग्रीसमेत जुटाए । तर एउटा विवादले ती सबै योजना रोकिए । कारण बनाईयो बागबजार–अनारखोली सडक खण्डको सडक क्षेत्राधिकार (राइट अफ वे) को विवाद ।

यही विवादका कारण अमरगढी नगरपालिकामा नक्सापास प्रक्रिया लगभग ठप्प बन्यो । घर निर्माण रोकियो, बैंकिङ कारोबार प्रभावित भए, सम्पत्ति हस्तान्तरणमा समस्या आयो । नगरपालिकाले नक्सापास दस्तुरबाट प्राप्त गर्ने राजस्व पनि प्रभावित भयो । नागरिक र स्थानीय सरकार दुवैले यसको असर महसुस गरे ।