फिल्म ‘गौँथली’ ले पहिलो सातामै कमायो साढे ७ करोड

काठमाडौँ । फिल्म ‘गौँथली’ ले पहिलो सातामै साढे ७ करोडको व्यवसाय गर्न सफल भएको छ । चलचित्र विकास बोर्डले सोमबार सार्वजनिक गरेको आइतबार राति दश बजेसम्मको बक्स अफिस रिपोर्टमा फिल्मको आम्दानी ७ करोड ४२ लाख ७३ हजार ८५९ रुपैयाँ ग्रस रहेको छ । फिल्मलाई सो अवधिमा २ लाख ६० हजार २५४ जनाले हरेका छन् ।

साउन १ गतेबाट प्रदर्शनमा आएको फिल्म गीतकार तथा स्त्रीरोग विशेषज्ञ डा. भोला रिजालका छोरा डा.कपिल रिजालले निर्देशन गरेका हुन् । योसँगै ‘गौँथली’ यस वर्षको सर्वाधिक कमाइ गर्ने दोस्रो फिल्म बनेको छ । पहिलो स्थानमा ‘जात्रा’ समूहको फिल्म ‘लालीबजार’ छ, जसले ९ करोड ३२ लाख रुपैयाँ ग्रस व्यापार गरेको थियो । यो फिल्मको रेकर्ड ‘गौँथली’ले यसै साता तोड्ने निश्चित देखिएको छ । किनभने फिल्मले यो साता झन् आक्रमक व्यवसाय गरिरहेको छ ।