प्रहरी जग्गा किर्ते प्रकरण : मालपोतका सुब्बाको २ वर्ष कैद सजाय उच्चबाट सदर

काठमाडौं– नेपाल प्रहरीको प्रशिक्षण केन्द्र (एकेडेमी) निर्माणका लागि छुट्याइएको ३६ रोपनी सरकारी जग्गा किर्ते कागजातका आधारमा व्यक्तिको नाममा दर्ता गराउने प्रयास गरेको अभियोगमा मालपोत कार्यालयका अवकाशप्राप्त नायब सुब्बा पुष्करबहादुर बस्नेतलाई जिल्ला अदालतले सुनाएको दुई वर्ष कैद सजाय उच्च अदालत पाटनले पनि सदर गरेको छ ।

उच्च अदालत पाटनका न्यायाधीश लालबहादुर कुँवर र प्रकाश ढुंगानाको संयुक्त इजलासले गत चैत २२ गते गरेको फैसलाको पूर्णपाठ हालै सार्वजनिक भएको हो ।