महिनौंदेखि ग्राहकलाई थाहै नदिई भित्रभित्रै डेटा-इन्टरनेट शीर्षकमा धमाधम ब्यालेन्स काट्दै एनसेल

काठमाडौं । निजी क्षेत्रको दूरसञ्चार सेवा प्रदायक कम्पनी एनसेलले मोबाइल डेटा पूर्ण रूपमा बन्द गरी वाई-फाई प्रयोग गरिरहेको अवस्थामा समेत ग्राहकको मेन ब्यालेन्सबाट धमाधम पैसा काटिरहेको फेला परेको छ । कम्पनीले डेटा-इन्टरनेट शीर्षकमा ग्राहकलाई थाहै नदिई विगत ९ महिनाभन्दा लामो समयदेखि निरन्तर रूपमा ब्यालेन्स काट्ने ‘लुप’ चलाइरहेको तथ्य टेकपानाको अनुसन्धानबाट उजागर भएको हो ।

ब्यालेन्स कटौती गर्दा प्रत्येक पटक १.२७ रुपैयाँ जस्तो सानो परिमाणमा रकम काटिने भएकाले धेरैजसो ग्राहकले यसको भेउ पाउन सकेका छैनन् । एनसेलको सिस्टममा देखिएको यो गम्भीर प्राविधिक कैफियत र उपभोक्तामाथिको ठगीबारे टेकपानाका पाठक विवेक गुप्ताले प्रमाणसहित ईमेलमार्फत जानकारी गराएका थिए ।