सहकारीले पैसा खायो, सरकारले पीडित बनायो

१२ साउन, काठमाडौं । माइतीघरमा सोमबार जम्मा भएका सहकारी पीडितको भिडमा एक फरक दृष्य थियो । आन्दोलनमा बौद्धिक अपाङ्गता बच्चालाई ह्विलचियरमा राखेर एक सहकारी पीडित सहभागी थिए । उनी अशक्त बच्चालाई लिएर बनेपादेखि आन्दोलनमा सहभागी हुन आएका थिए ।

बनेपाको कान्तिपुर सहकारीमा ३० लाख रुपैयाँ बचत राखेका उनै राजु सिलवालको दैनिकी जटिल बन्दै गएको छ । उनी आफ्नो छोरालाई ह्विलचियरमा राखेर आन्दोलनमा होमिन बाध्य छन् । ‘सहकारीमा घरजग्गा बिक्री गरेर राखेको पैसा न फिर्ता हुन्छ, न त ब्याज पाइन्छ, त्यही पैसा उठाउन आन्दोलनमा धाउनु परेको छ’ उनले भने । राज्यले नै जनता मार्ने सिस्टम बनाएकाले सहकारीबाट आफूहरू पीडित हुनु परेको उनको गुनासो छ ।