बोर्डको स्वीकृतिबिनै विज्ञापन प्रसारण गरे कारबाही, सबै सामग्री अनिवार्य परीक्षण गर्न निर्देशन

विज्ञापन बोर्डले नेपालभित्र प्रसारण हुने सबै श्रव्य, दृश्य तथा श्रव्यदृश्य विज्ञापन सामग्री प्रसारण गर्नुअघि अनिवार्य रूपमा बोर्डबाट परीक्षण गराई प्रसारण अनुमति लिन सम्बन्धित सबै पक्षलाई निर्देशन दिएको छ।

बोर्डले सोमबार जारी गरेको सूचनामा बोर्डको स्वीकृति नलिई विभिन्न सञ्चारमाध्यमबाट विज्ञापन प्रसारण भइरहेको पाइएको उल्लेख गरेको छ। साथै, केही विज्ञापनमा विज्ञापनकर्ताको नाम, ठेगाना, चेतावनीमूलक सन्देशलगायत अनिवार्य विवरण समावेश नगरिएको र तथ्यहीन, अतिरञ्जित तथा उपभोक्तालाई भ्रममा पार्ने सामग्रीसमेत प्रसारण भइरहेको जनाएको छ।