आर्थिक विधेयकमा त्रुटि नै त्रुटि

सरकारले आगामी आर्थिक वर्ष २०८३/८४ का लागि प्रस्तुत आर्थिक विधेयक २०८३ मा त्रुटीनै त्रुटी देखिएका छन् । एकपछि अर्को गर्दै त्रुटि सच्याउनुपर्ने अवस्था सिर्जना भएपछि अर्थ मन्त्रालयको तयारी र अर्थमन्त्री डा. स्वार्णिम वाग्लेको कार्यशैलीमा प्रश्न उठेको छ ।

संसदमा दर्ता भइसकेको विधेयकमा समेत पटक–पटक संशोधन गरिनु परेपछि यो सामान्य प्रशासनिक कमजोरी मात्र हो वा नियतवश गरिएको चलखेल हो भन्ने आशंका उब्जिएको छ । बजेट सार्वजनिक भएको केही दिनमै अर्थ मन्त्रालयले आर्थिक विधेयकलाई चार पटकसम्म संशोधन गरेर वेबसाइटमा पुनः प्रकाशन गरेको छ । त्यसपछि अर्थमन्त्रीले संसद सचिवालयलाई पत्राचार गर्दै विभिन्न पाँचवटा बुँदामा सच्याइएको जानकारी गराएका छन् । यस क्रममा करका दर, शुल्कको संरचना, कर छुटका व्यवस्था तथा भन्सारसम्बन्धी प्रावधानहरूमा समेत परिवर्तन गरिएको छ ।