आज देशभरका अस्पतालहरूमा आकस्मिक बाहेकका सबै  सेवा बन्द

काठमाडौं । नारायणी अस्पतालमा चिकित्सक तथा स्वास्थ्यकर्मीमाथि भएको साङ्घातिक आक्रमण र जिल्ला प्रशासन कार्यालय पर्सामा भएको दुर्व्यवहारको विरोधमा नेपाल चिकित्सक संघले आज (मंगलबार) देशभरका अस्पतालहरूमा आकस्मिक बाहेकका सम्पूर्ण सेवाहरू बन्द गर्ने घोषणा गरेको छ।

संघले सोमबार प्रेस विज्ञप्ति जारी गर्दै सरकारी, गैरसरकारी तथा निजी अस्पतालहरूमा आकस्मिक सेवाबाहेकका सबै सेवा ठप्प पार्ने जानकारी गराएको हो। गत साउन ९ गते नारायणी अस्पतालमा कार्यरत डा. प्रमोद राम लगायतका चिकित्सक तथा स्वास्थ्यकर्मीहरूमाथि आक्रमण गरी टाउकोमा गम्भीर चोट पुर्‍याइनुका साथै अस्पतालमा तोडफोड गरिएको थियो।