कांग्रेसका मन्त्रीहरूको राजीनामा होल्ड

लुम्बिनी प्रदेश सरकारबाट राजीनामा दिने तयारीमा रहेका नेपाली कांग्रेसका मन्त्रीहरूको राजीनामा होल्ड भएको छ। कांग्रेसका तर्फबाट प्रदेश सरकारमा रहेका पाँचजना मन्त्रीहरूको राजीनामा सोमबार मुख्यमन्त्री चेतनारायण आचार्यसमक्ष पेस गर्ने तयारी थियो। पाँचैजना मन्त्रीहरूले पार्टी संसदीय दलको कार्यालयमा आआफ्नो राजीनामा पत्र आइतबारै पठाइसकेका थिए, तर सोमबार उनीहरूले राजीनामा बुझाउने तयारी गरेको भए पनि कांग्रेसले राजीनामा होल्ड गरिदिएको हो।

कांग्रेस संसदीय दलले नै आफ्ना मन्त्रीहरूको राजीनामा केही समय होल्ड गर्ने निष्कर्षमा पुगेको कांग्रेसले जनाएको छ। ‘प्रदेश सरकारमा रहेका हाम्रा पार्टीका मन्त्रीहरूले राजीनामा सोमबार बुझाउने भन्ने अन्तिम तयारी थियो, उहाँहरू सबैको राजीनामा पत्र संसदीय दलसमक्ष पुगिसकेको छ’, कांग्रेस प्रदेश प्रमुख सचेतक जमुना ढकालले भनिन्, ‘राजनीतिक दलहरूका बिचमा भएका केही संवादले अहिल्यै राजीनामा दिन हतार गर्न नहुने भन्ने निष्कर्ष निकालेपछि हाललाई रोकिएको छ।’