सुरुङ खुल्यो, राजमार्ग दुरवस्थामै

काठमाडौं प्रवेश गर्ने त्रिभुवन राजपथअन्तर्गत नागढुंगा–सिस्ने खण्डमा निर्मित सुरुङमार्ग सञ्चालनमा आएसँगै नेपालको सडक सुरुङ युगमा प्रवेश गरेको छ। यो सुरुङमार्ग सञ्चालनमा आएपछि यसको जस लिने होडमा सरकार र राजनीतिक दल जुटेका छन्। तर सुरुङमार्ग प्रवेश गर्ने राजमार्गको दुरवस्थाका विषयमा भने कसैलाई चासो र चिन्ता छैन। राजमार्गको दुरवस्थाका कारण यात्रु जोखिम मोलेर यात्रा गर्न बाध्य छन्।

काठमाडौंबाट नौबिसेसम्म त्रिभुवन राजपथ पर्छ। पोखराबाट सुरु हुने पृथ्वी राजमार्ग नौबिसेमा आएर मिल्छ। काठमाडौं प्रवेश गर्ने यो मार्ग अतिव्यस्त हुन्छ। यो मार्गमा दैनिक हजारौं सवारी र मालवाहक साधन गुड्छन्। पूर्वपश्चिम राजमार्गको नारायणगढबाट काठमाडौं जाने सडक मुग्लिनमा पुगेर पृथ्वी राजमार्गमा मिल्छ। पृथ्वी राजमार्गमा मिल्ने नारायणगढ–मुग्लिन खण्ड पहिरोको चपेटामा छ।