स्रोत अभावले थन्किएका आविष्कार-नवप्रवर्तनमा सरकारले लगानी गर्ने, प्रोटोटाइप बनाउनेलाई निम्तो

काठमाडौं । विज्ञान, प्रविधि तथा नवप्रवर्तनमन्त्री महावीर पुनले स्रोत र साधनको अभावमा अगाडि बढ्न नसकेका अनुसन्धान र आविष्कारहरूलाई सरकारले सहयोग गर्ने घोषणा गरेका छन् । मंगलबार फेसबुकमा एक पोस्ट राख्दै मन्त्री पुनले विगतका वर्षहरूमा अनुसन्धानकर्ता वा नवप्रवर्तकहरूले तयार पारेका उपयोगी वस्तु वा सेवाका नमुना (प्रोटोटाइप) हरूलाई मन्त्रालयले अगाडि बढाउने जानकारी दिएका हुन् ।

धेरै नवप्रवर्तकहरूले व्यवहारिक अनुसन्धान मार्फत राम्रा प्रोटोटाइपहरु बनाए पनि आर्थिक अभावका कारण ती कामहरू थन्किएर बसेको गुनासा आउने गरेका छन् । मन्त्रालयले त्यस्ता नमुनाहरूको अध्ययन गरी आवश्यक सहयोग उपलब्ध गराउने योजना बनाएको छ । यसका लागि मन्त्रालयले चाँडै नै औपचारिक रूपमा प्रस्ताव आह्वानको सूचना सार्वजनिक गर्ने तयारी गरेको पुनले जानकारी दिए ।