भुइँमा सुत्नुपर्दा कुरुवा नै बिरामी

काभ्रेकी रामकुमारी तामाङ पति सन्तबहादुर तामाङकी कुरुवा बनेको महिनौं भइसकेको छ। नसारोगका कारण हिँड्न नसक्ने भएपछि सन्तबहादुर तीन–चार महिनादेखि उपचारका लागि अस्पताल धाइरहेका छन्। यही क्रममा दुई साताअघि उनी वीर अस्पतालको मेल मेडिकल वार्डमा भर्ना भएका हुन्। अस्पताल भर्ना भएयता रामकुमारी दिनरात पतिकी कुरुवा छिन्।

रामकसमारी दिनभरि कुर्सीमा बस्छिन् र राति पतिको शय्यामुनि साँघुरो ठाउँमा भुइँमा म्याट बिछ्याएर सुत्छिन्। चिसो भुइँमा सुत्नु सहज नभएकाले उनलाई खोकी लाग्न थालेको छ। तर पतिको हेरचाहका लागि कुरुवा बन्नु उनको बाध्यता हो। ‘भुइँमा सुतेर बिरामी हेर्न सजिलो छैन। हेरचाह राम्रो होला भनेर धेरैजसो आफैं कुरुवा बस्छु,’ उनले भनिन्। धेरै बिरामी भएको वार्डमा भुइँमा सुत्नुपर्दा असहज लाग्ने भए पनि विकल्प नभएको उनको भनाइ छ। ‘कुनै उपाय नभएपछि भुइँमै सुत्दै आएकी छु,’ उनले भनिन्।