नेकपाले भन्यो- सुनसरी घटनाको सम्पूर्ण जिम्मेवारी सरकारले लिनुपर्छ

काठमाडौं । नेपाली कम्युनिस्ट पार्टीले सुनसरीको देवानगञ्ज गाउँपालिका–३, कप्तानगञ्जमा घटनाको सम्पूर्ण जिम्मेवारी सरकारले लिनुपर्ने जनाएको छ। प्रवक्ता प्रकाश ज्वालाले विज्ञप्ति जारी गर्दै नागरिकमाथि गोली चलाउनुपर्ने अवस्था नै नभएको ठाउँमा चलाइएको दाबी गरेका छन्।

विज्ञप्तिमा भनिएको छ, ‘अझ घातक हतियार प्रयोग गरी नियम–कानुनविपरीत घुँडामाथि गोली हानी निहत्था नागरिकको हत्या गर्नु गम्भीर अपराध र राज्य आतङ्क हो । सामाजिक सद्भाव कायम राख्नुपर्ने संवेदनशील घडीमा राज्य अझ बढी संयमित, सतर्क र जिम्मेवार हुनुपर्नेमा यस घटनामा सरकारको सुरक्षा संयन्त्रबाट भएको ज्यादती स्पष्ट रूपमा देखिएको छ ।’