एकै दिनमा सत्ता पल्टाउने अरे !

सत्ता हातमा लिएको करिब चार महिना बितेर जाँदै गर्दा बालेन्द्र साह नेतृत्वको सरकारले पहिलेका शासनको कुर्सीमा बसेका र ठुलै माछाका रुपमा गणना गरिएका भ्रष्टाचारीका नाइकेलाई समेत पक्राउ गरी कार्यवाहीको डण्डा निर्मम तरिकाले चलाएको छ । तर सरकारको यो कामले भ्रष्टाचारका नायकहरूका दिल र दिमागमा हलचल मच्चाएको मात्र नभई अब पक्राउ परिएला कि भन्ने डर दैनिक रुपमा बढेर गएको छ । यो डरलाई ढाकछोप गरेर कसैले नदेखून् र थाहा नपाऊन् भन्नाका लागि नक्कली कागजपत्र मिलाउन दौडधूप छ ।

विगतमा टाढिएका विभिन्न राजनीतिक दलसँग एकता गरेर, एकले अर्कालाई सघाएर विगतका आपराधिक कार्यको पोल खुल्न नदिनु एक कर्म भएको छ भने विगतमा आ–आफ्ना कार्यकर्ताले आ–आफ्ना नेतालाई जुन र जस्तो सम्मान दिएका र बफादारी कायम गरेकोमा अबका दिनमा पनि सोही सम्मान दिऊन् र नेतृत्वको प्रशंसा गर्दै आफ्नै महिमाको गुणगान गरुन् भन्ने आशय ती शीर्ष नेताको अभिव्यक्तिको मूल आशय रहेको पाइन्छ । कहिले उनीहरू धेरै पीडाले सताएको नाटक देखाएर आँसु नै बगाउँला कि जस्तो गरेर रुन्चे स्वरमा धेरै दिनको भोको भिखारीले भिक्षा मागेको स्वरमा आम नेपाली जनतासामु हामीले गरेका विगतका आपराधिक कर्मको लागि छुट देओ भनेर मगन्ते स्वरुपमा माग्छन् भने कहिले सिंह गर्जेको स्वरमा गर्जन गर्दै वर्तमानको बालेन नेतृत्वको सरकार एकै दिनमा ढाल्ने अभिव्यक्ति ओकलिरहेका हुन्छन् ।