नारायणी अस्पतालका ४६ चिकित्सकले दिए राजीनामा

काठमाडौं।

नारायणी अस्पतालको आकस्मिक कक्षमा गत शनिबार भएको तोडफोड तथा ड्युटीमा रहेका चिकित्सकमाथि कुटपिटको घटनापछि उत्पन्न विवाद थप चर्किएको छ। अस्पतालमा कार्यरत ४६ जना चिकित्सकले वर्तमान परिस्थितिमा सुरक्षित रूपमा काम गर्न नसकिने निष्कर्षसहित मंगलबार सामूहिक राजीनामा दिएका छन्। गत शनिबार उपचारका लागि ल्याइएका एक बिरामीको मृत्यु भएपछि आक्रोशित आफन्तले आकस्मिक कक्षमा तोडफोड गर्नुका साथै मेडिकल अफिसर डा. प्रमोद राममाथि मरणासन्न हुने गरी कुटपिट गरेका थिए। घटनामा गम्भीर घाइते भएका डा. रामको उपचार जारी छ।