नारायणगढ–मुग्लिन सडकखण्डमा नयाँ स्थानमा पहिरो, एकैदिन दुई पटक सडक अवरुद्ध

नारायणगढ–मुग्लिन सडकखण्डमा मंगलबार नयाँ स्थानमा सुख्खा पहिरो खस्दा सडक दुई पटक अवरुद्ध भएको छ। पहिरो पन्छाएर सडक सञ्चालनमा ल्याइए पनि पुनः सोही क्षेत्रमा पहिरो खसेपछि केही समयका लागि यातायात प्रभावित भएको हो।

सडक डिभिजन कार्यालय भरतपुरका अनुसार बिहान करिब ७ः३० बजे मुग्लिन बजारनजिक खहरे खोलामा सुख्खा पहिरो खस्दा सडक पूर्ण रूपमा अवरुद्ध भएको थियो। करिब पाँच घण्टाको प्रयासपछि पहिरो पन्छाएर सडक सञ्चालनमा ल्याइएको थियो।