तलब भत्ता सुधार विधेयकको विरोधमा रोमानियामा हजारौँ स्वास्थ्यकर्मी आन्दोलित, सेवा ठप्प

काठमाडौं । रोमानियामा सरकारले ल्याउन लागेको तलब भत्ता सुधारसम्बन्धी एकीकृत विधेयकको विरोध गर्दै हजारौँ स्वास्थ्यकर्मीहरूले देशव्यापी अनिश्चितकालीन हडताल सुरु गरेका छन्। बितेको एक दशकमा स्वास्थ्य क्षेत्रमा भएको यो नै सबैभन्दा ठूलो आन्दोलन हो।

सानितास युनियनका अध्यक्ष युलियन पोपाका अनुसार देशका ४०० भन्दा बढी अस्पताल तथा स्वास्थ्य संस्थाहरूमा कार्यरत करिब दुई तिहाइ कर्मचारीहरूले कामकाज पूर्ण रूपमा ठप्प पारेका छन्। हडतालका कारण अस्पतालहरूमा आकस्मिक सेवा सुचारु राखिए पनि पूर्वनिर्धारित शल्यक्रिया तथा अन्य गैर-आकस्मिक स्वास्थ्य सेवाहरू भने स्थगित गरिएका छन्।