सत्ताकेन्द्रित सहकार्य होइन, सिद्धान्त र विचार मिल्नेहरूसँग एकता

१. इतिहासले दिएको अवसर

नेपालको कम्युनिस्ट आन्दोलन पार्टी गठन, विभाजन र एकीकरणको इतिहास मात्र होइन, यो राष्ट्रिय स्वाधीनता, लोकतान्त्रिक रूपान्तरण, वर्गीय संघर्ष र समाजवादउन्मुख परिवर्तनको सात दशकभन्दा लामो यात्रा हो। यस आन्दोलनले लोकतान्त्रिक गणतन्त्रको स्थापना, संविधान निर्माण र राजनीतिक परिवर्तनमा ऐतिहासिक नेतृत्व गरेको छ। तर, आन्दोलन जति शक्तिशाली बन्दै गयो, त्यति नै वैचारिक विचलन, नेतृत्वकेन्द्रित प्रतिस्पर्धा, गुटबन्दी र सत्तामोहका कारण विभाजन दोहोरिँदै गएको छ। परिणामस्वरूप जनविश्वास कमजोर हुँदै गयो र आन्दोलनको प्रभाव क्रमशः खुम्चिँदै छ।