काभा मेन्स भलिबल: नेपाल जितविहीन हुँदै बाहिर

नेपाली टोली पाकिस्तानमा भएको काभा मेन्स भलिबल च्याम्पियनसिपमा जितविहीन हुँदै प्रतियोगिताबाट बाहिरिएको छ।

इस्लामाबादमा मंगलबार भएको पाँचौं स्थानको खेलमा नेपाली टोली कजाखस्तानसँग ३–० को सोझो सेटमा पराजित भएसँगै च्याम्पियनसिपमा जितविहीन हुँदै बाहिरिएको हो। लियाकत व्यायामशालामा नेपाली टोलीले एउटा सेटमा मात्र प्रतिर्धात्मक प्रदर्शन गर्न सक्यो। पहिलो सेटमा नेपालले २५–१८ ले सहजै गुमायो। दोस्रो सेट भने प्रतिस्पर्धात्मक बन्यो। तर, यो सेट पनि कजाखस्तानले २७–२५ ले आफ्नो बनायो। तेस्रो सेटमार्फत नेपाल खेलमा फर्कने आशा गरिएको थियो। तर, यो सेट पनि नेपालले २५–२० ले गुमाएपछि जितविहीन हुँदै देश फर्किने भएको छ। नेपाली टोली दोस्रोपल्ट कजाखस्तानसँग पराजित भयो।