वायु रक्षा क्षमता बढाउन इरानले चीनबाट मिसाइल प्रणाली खरिद गर्दै

काठमाडौं । इरानले आफ्नो वायु रक्षा क्षमता सुदृढ बनाउन चीनबाट निर्मित पोर्टेबल वायु रक्षा मिसाइल प्रणाली (म्यानप्याड्स) खरिद गरेको र त्यसको पहिलो डेलिभरी केही साताभित्र प्राप्त गर्ने तयारी भइरहेको छ । रोयटर्सका अनुसार इरानले ३०० देखि ४०० वटा क्यूडब्ल्यू–१२ र एफएन–१६ प्रकारका वायु रक्षा मिसाइल प्रणाली खरिद गर्न सम्झौता गरेको छ। मिसाएलका लागि ६० देखि ७० मिलियन अमेरिकी डलर रहेको सम्झौता भएको बताइएको छ।

सम्झौता हङकङस्थित झोङछिङ बाओशाङ इन्टरनेसनल इन्भेस्टमेन्टमार्फत भएको हो, जसले इरानी पक्ष र चिनियाँ आपूर्तिकर्ताबीच मध्यस्थकर्ताको भूमिका निर्वाह गरेको छ । अमेरिका र इजरायलसँगको युद्धका क्रममा आफ्ना सैन्य संरचना, मिसाइल कार्यक्रम तथा रणनीतिक पूर्वाधारमा क्षति पुगेपछि इरानले पुनः सैन्य क्षमता विस्तार गर्ने प्रयास गरिरहेको बताइएको छ। युद्धले इरानको वायु रक्षा प्रणालीका कमजोरीहरू पनि उजागर गरेको विश्लेषण गरिएको छ।