इरान समर्थित समूहलाई लक्षित गर्दै साउदी र अमेरिकाको संयुक्त हवाई आक्रमण

अमेरिका : इराकको पपुलर मोबिलाइजेसन फोर्सेस (पीएमएफ) ले साउदी अरब र अमेरिकाले संयुक्त रूपमा गरेको हवाई आक्रमणमा आफ्ना आठ सदस्य मारिएको र अन्य चार जना घाइते भएको जनाएको छ । साउदी अरब र अमेरिकी सेनाको सेन्ट्रल कमाण्डले बुधबार बिहान जारी गरेको विज्ञप्तिमा इराकस्थित इरान समर्थित मिलिसिया समूहहरूलाई लक्षित गरी संयुक्त हवाई आक्रमण गरिएको जनाएको छ । ती समूहहरू अमेरिकी सैनिक र साउदी अरबको ऊर्जा पूर्वाधारमाथि भएका आक्रमणका लागि जिम्मेवार रहेको दाबी गरिएको छ ।

साउदी रक्षा मन्त्रालयले जारी गरेको विज्ञप्तिमा भनिएको छ, ‘हालै भएका ड्रोन आक्रमणहरूको जवाफस्वरूप यी कारबाही गरिएको हो ।’ मन्त्रालयका अनुसार साउदी वायु प्रतिरक्षा प्रणालीले पूर्वी प्रान्त र रियाद क्षेत्रमा रहेका पेट्रोलियम पूर्वाधारलाई निशाना बनाउन इराकबाट प्रक्षेपण गरिएका धेरै ड्रोनहरू अवरोध गरी नष्ट गरेको थियो । ती ड्रोन इरान समर्थित आतंकवादी मिलिसियाले प्रक्षेपण गरेको दाबी पनि गरिएको छ ।